Uffg'Blues'd

De Fiehrerschoi

Wachschd uff un weschd
der Dach is fer dich wischdisch,
Du denkschd "ach Gott,
hoffentlich mach isch alles rischdisch".
Un's fahrt mer wie'n Blitz in de Mache noi
heit hawisch Priefung fer moin Fiehrerschoi

Moin Blutdruck, geht nuff
uff zwähunnerddreißisch,
hab hoimlich geübt,
war hoffentlich fleißisch,
isch glaab isch lang' heit widder noi,
heit hawisch Priefung fer moin Fiehrerschoi

Manch äner, glaabt mer
hot soin Fiehrerschoi gewunne,
doch mir hawwe se ball
moin gonze Mut genumme.
Heit muß isch gut besamme soi
heit hawisch Priefung fer moin Fiehrerschoi

Einstein, Newton un Archimedes
die hätte heit ihr Mieh,
bei denne gonze Vorschrifte
ihrn Fiehrerschoi zu krie'
Des solle heit net moi Sorsche soi
heit hab isch Priefung fer moin Fiehrerschoi

Isch streng misch o,
un bass gut uff,
beim Oiparke fahr isch
uff en annere druff.
Un bin isch donn fertisch, besauf mit mit Woi
heit war widder nix mim Fiehrerschoi

Des koschd e Vermösche,
en Haufe Geld.
Do hätt sich mer besser
immer e Taxi bestellt.
De Vadder muß zahle mit gonz große Schoi,
heit hawisch Priefung fer moin Fiehrerschoi

Zurück